Fóra de Lugar

- GALAICOPORTUGUÉS, chaman á lingua dos trovadores e das Cantigas de Afonso X. Non galaico-portugaico, nin castellanaico nin francesaico. Os mestres que non podían soportar a existencia do galego buscáronlle un disfrace de cousa rara, etérea. Pois non, galego. Que xente é esa que lle ten medo ás linguas?

- ONDE VAI O FRANCÉS? Antes a xente estudaba francés. E onde van os cantantes franceses? Ninguén nos avisou que en chegando o inglés había botar fóra ao francés. As linguas son feroces.

- PAGA A PENA O FRANCÉS. Aínda que nada máis fose por entender as cancións dun belga, Brel, dun armenio, Aznavour, dun anarquista monagasco, Ferré.

- FEDERAL. Un amigo lembra a Azaña: España será federal ou non será. E se non fose así? E se pensar así conduce onda a Azaña? Exilio e fracaso. Fóra de lugar.

- TODOS BUSCAMOS UN LUGAR NA VIDA E NO MUNDO. Algúns buscan unha vida nun lugar fóra de lugar. E acaban nel ao dereito.

- E QUE HABÍA SABER AZAÑA? Quen sabe nada? Quen sabe cousa de como ha ser o mundo? Leo que editan un libro colectivo dunha chea de científicos e pensadores con predicións sobre o mundo en 25 anos. E como non habemos rir.

- "EMMENEZ MOI", canta Aznavour. "Lévame á fin do mundo. Lévame ao país das marabillas. Coido que a miseria ha ser máis levadeira ao sol".

- MAL ESCRITOR. Non me debo enganar nesta altura, inimigos habelos hainos. Quen aborrecen as miñas ideas sobre sociedade e política fanme ver que me aborrecen. Non se pode evitar, non é doado cambiar de xeito de pensar, para eles tampouco. Nin cambiar de modo de sentir, non me han querer mellor.

- O PEOR é que ademais de sinalarme os meus erros acaban sempre en denunciar a miña pobreza intelectual e literaria: son mal escritor. Sobro e mais estou fóra de lugar. E se son xente informada? E se cren o que din? E se acertan? Quen sabe. Fatigar, fatiga.

- CADA VEZ MÁIS DUBIDO destas botellas. Teñen unha respiración lenta de máis, debera escribir máis ás présas. Tamén nesta páxina.

- ESCRIBIR, ao cabo é un traballo espiritual. Andamos fóra de lugar. Debera escribir máis formal, tamén aquí. As páxinas dun xornal aturan case todo; todo, todo non. Un día trouxen estas botellas da Rede para aquí, tan fóra de lugar, quen sabe se non debían voltar á Rede.