A 'Jalisia' en fotos de Xurxo Lobato chega a A Coruña
Catorce instantáneas a gran formato do fotógrafo Xurxo Lobato (A Coruña, 1956) estrean, desde hoxe, o seu novo proxecto, Jalisia is my country, na galería Moret da Coruña. Os rexistros, tomados en diversas romarías galegas durante o pasado verán de 2010, captan parte da última transformación da sociedade galega, aínda dacabalo entre o mundo rural e o mundo urbano, a través de retratos de mulleres, deliberadamente rexistradas sen rostro, "para reforzar a potencia narrativa do discurso".
No fresco que presenta Xurxo Lobato, colaborador de EL PAÍS, conviven minisaias, ex votos e tacóns de agulla. Mulleres co pano na cabeza e mulleres vestidas con roupa de Zara que asisten ás celebracións rituais da morte, como a coñecida procesión dos cadaleitos de Santa Marta de Ribarteme, coas unllas pintadas e envoltas en cores e non en branco e negro. "Formalmente, eu aposto polo expresionismo a través da cor e polo conceptual á hora de encadrar a imaxe", explícase o fotógrafo. "No tocante ao contido, trátase dunha visión renovadora da Galicia tradicional".
"Hai un cambio sociolóxico que está aí, só cómpre fixarse nel", razoa o autor, quen desbota calquera pretensión etnográfica ou antropolóxica neste traballo e co que segue a afondar en dúas cuestións, a identidade e a transformación, vertebradoras da súa dilatada traxectoria detrás da cámara. De feito, a serie continúa, arestora no eido do hábitat. Unha atención ao espazo coa que Lobato amplía o sentido do título xeral e unha actitude documental en sintonía con dúas das propostas expositivas de fotografía máis celebradas polo público galego, como son a retrospectiva do gran Virxilio Vieitez no museo Marco de Vigo e o retrato de Galicia por Cristina García Rodero, que se pode visitar no Centro Galego de Arte Contemporánea de Santiago de Compostela.
