Outros tres libriños d'O Moucho

Os libriños d'O Moucho regresan hoxe aos quioscos con Foliadas do gaiteiro, de Xoán Manuel Pintos Villar. Os volumes, reeditados en formato facsímile pola editorial Galaxia e EL PAÍS, saen á rúa polo prezo dun euro. Os nomes da terra, de Celso Baión (pseudónimo de Xosé María Álvarez Blázquez), venderáse o luns día 12 de maio, e Os contos do pobo, de Rosalía de Castro, o vindeiro mércores 14. O editor e escritor Xosé María Álvarez Blázquez, a quen homenaxea o Día das Letras Galegas deste ano, fundou a popular colección O Moucho na década dos 60.

Foliadas do gaiteiro é unha antoloxía de textos escolmados d' A gaita gallega tocada polo gaiteiro, ou sea carta de cristus para ir deprendendo a ler, escribir e falar ben a lengua gallega, e ainda mais, unha das pezas chave dun dos chamados "precursores" do Rexurdimento, Pintos Villar. No limiar da edición d'O Moucho, orixinal de 1968, comparece unha cita da Historia da Literatura Galega de Carvalho Calero: "Pintos é realmente o gran precursor [...] Razón ten Cabanillas pra decir referíndose Á gaita gallega que 'este libro é a pedra de alicerce da nosa renacencia".

A primeira edición d'Os nomes da terra, recolleita e prólogo asinados por Celso Baión, data de 1975 e trata "a interpretación popular das etimoloxías toponímicas". Para Álvarez Blázquez, "aí se manifesta o desenrolo da fantasía especulativa do pobo". En Contos do pobo, edición orixinal n'O Moucho de 1970, Álvarez Blázquez xuntou "algunhas das máis caracterizadas mostras de humor rosalían". Trátase de tres relatos nos que se acha "a esencia do humorismo popular": Dous amigos e a viuda, ¡Adiante co varal! e ¡A pobriña está xorda...!, un en prosa e dous en verso.