Unha proposta 'senigual'
A galego-arxentina María Rosa Lojo publica un libro ilustrado pola filla
"Son seres do vento que pousan na terra, e que encol dela precisan caxato. Seres femininos sen cara precisa e con longas cabeleiras desproporcionadas de sereas aéreas". Este é o inicio de O libro das senisguais e ao mesmo tempo a descrición dos seres que protagonizan unha historia ilustrada nacida da colaboración entre a escritora galego-arxentina Maria Rosa Lojo, a cargo da parte literaria, e da súa filla, Leonor Beuter, a cargo das imaxes. A obra xa pode atoparse nas librerías galegas e ao longo do próximo ano tamén poderá mercarse nas tendas de Arxentina. "Aínda que poida parecelo, non é un produto pensado para os nenos. Iso si, creo que cumpre coas condicións que debe ter a literatura infantil e que para min é aquela que tamén os nenos poden ler", explica María Rosa Lojo.
"A literatura infantil é aquela que tamén os nenos poden ler", afirma Lojo
A coautora do libro sinala que a idea partiu da súa filla, quen creou os bonecos que protagonizan a historia baseándose nos quitapenas, uns seres habituais na tradición oral de diversos países de América Central. "Eu tardei algún tempo en engancharme coa proposta, pero ao final decidinme e tratei de construír una xenealoxía das seniguais que é no que consiste o libro", apunta Lojo, quen recorreu a Galaxia, a súa editorial en Galicia, para facer realidade o proxecto. Polo alto custo que supuña a edición non foi posible facelo na Arxentina. De calquera xeito, a Editorial Galaxia ten previsto distribuír o libro no país austral e tamén edítalo en castelán. Lojo non descarta que a obra poida ter continuidade para editar novos libros que teñan historias protagonizadas polas seniguais.
O libro consta de medio cento de páxinas, nas que se poden ler descricións sobre o mundo das seniguais xunto a fotografías realizadas cunha coidada escenografía e na que aparecen os bonecos protagonistas da historia. "Os textos son bastante irónicos e teñen moito sentido implícito, pero non creo que iso sexa un problema para que aos nenos lles poida resultar moi atractivo", explica a autora, que combina habitualmente na súa obra elementos da terra arxentina, onde naceu, coas vivencias da tradición galega herdada da súa familia. O pai de María Rosa foi un galego republicano que emigrou a Arxentina despois da Guerra Civil.
Lojo é unha autora moi coñecida, e recoñecida, en Arxentina, especialmente polas súas obra de raíz histórica, e formou parte da delegación de escritores deste país que participou na recente Feira do Libro de Francfort, onde o austral foi país convidado. A última das súas novelas publicouse en Arxentina en marzo deste ano. Trátase de Arbol de familia, unha historia en que se mesturan as raíces galegas e arxentinas da autora e na que reflexa dende diversos puntos de vista os contextos sociais e políticos da diáspora española, e particularmente a galega, a finais do século XIX por motivos económicos e despois da Guerra Civil por causas políticas. Ademais da súa actividade coma novelista, Lojo tamén é investigadora e publicou varios ensaios, un deles (feito en colaboración con outros dous autores) trata sobre a evolución da imaxe dos galegos entre os arxentinos.