A conexión galega de Miles Davis

Miles Davis titulou Esbozos de España o seu 29º elepé. Editado en 1960 e arranxado por Gil Evans, igual que Porgy and Bess ou Miles ahead, Sketches of Spain pescuda na música ibérica de raíz arábica e mesmo no repertorio clásico. Concierto de Aranjuez ou Saeta son pezas incluídas polo trompetista afroamericano na gravación. Pero é o corte The pan piper onde se estabelece a conexión galaica de Davis: a melodía tradicional Alborada de Vigo constitúe a base sobre a que colaboran Evans e Davis.

O traxecto que percorreu o músico de Saint Louis até chegar á tradición galega pasa polo antropólogo musical Alan Lomax. Nado en 1915 e morto hai 6 anos, Lomax viaxou pola Península Ibérica en 1951, cando vivía exiliado do macarthysmo en Londres, para recoller material sonoro en Euskadi, Cataluña ou Andalucía. "Todo son cuarteis poeirentos, bandalleiros, co mesmo cartel sobre as portas: 'Todo pola patria", escribía no seu caderno de viaxe á España do fascismo, "resulta tan forzado que un non deixa de se preguntar 'a patria de quen?".

Fisterra, Corcubión, Ribadavia ou Sobrado do Bispo foron algúns dos lugares nos que parou Lomax na súa colleita. A Alborada de Vigo, en interpretación do gaiteiro José María Rodríguez, recolleuna Lomax e púxoa no disco The spanish recordings: Galicia, en 1953. E aínda que en certos foros jazzísticos atribúen ao folclore peruano o esqueleto de The pan piper, a estirpe galaica ficou constatada na antoloxía The Alan Lomax popular songbook. A única melodía ibérica escolmada, en base á súa utilización por Miles Davis, era a Alborada de Vigo.