O Centro Piñeiro edita prosas inéditas de Uxío Novoneyra
A practicamente un mes do Día das Letras Galegas, a tradicional colleita bibliográfica arredor do autor homenaxeado xa é abondosa. Sobre o poeta Uxío Novoneyra (O Courel, 1930 - Santiago, 1999) apareceron biografías -a novelada de Antón Lopo, A distancia do lobo, entre as máis salientábeis- ou estudios -Novoneyra revisitado, de Xosé Lois García. E aínda faltan por comparecer anunciadas reedicións e antoloxías da súa obra.
Pórén, unha das contribucións máis substanciosas está na rúa dende hai dous meses: A casa! o val! a patria homilde!. Celebración de Uxío Novoneyra (1930-1960). Editado polo centro Ramón Piñeiro, dependente de Política Lingüística, o volume recolle unha "miscelánea" de textos de variado xorne e procedencia. Fragmentos biográficos, prosas poéticas, bocexos de autopoética, facsímiles caligráficos ou mostras epistolares forman un libro do que se responsabilizan Luís Alonso Grigado, Alexandra Cillero e Élida Abal. A escrita de Novoneyra publícase ao coidado da filóloga Iris Cochón e do amigo do poeta Luís Cochón, quen achegou boa parte dos materiais inéditos ou espallados.
Fóra dos cinco poemas descoñecidos e das cartas con correspondetes como Valente, Díaz Castro, Cuña Novás ou Carlos Maside, é o apartado de prosa o máis nutrido de anacos non rexistrados antes do traballo de Novoneyra. De introducións a recitais, moitos deles para escolares, a intervencións en convocatorias sindicais ou en homenaxes -a Pablo Neruda en Ferrol, a Celso Emilio en Madrid ou Caracas-, A casa! o val!... consigna medio cento de prosas.
Nun último epígrafe, os editores xuntan cinco autopoéticas éditas pero aprisionadas en publicacións periódicas. Para Escrita, a antiga revista da Asociación de Escritores, Novoneyra explicábase: "Pra min, a poesía é unha forma de entusiasmo, unha forma de responsabilidade".